14.12.2017 : பெரியவா ஆராதனை : கண்ணீர் மாலை

14.12.2017 : பெரியவா ஆராதனை : கண்ணீர் மாலை

இன்று குருவாரம். பெரியவா ஆராதனை நடக்கும் நாள்.

“யானேபொய் என்நெஞ்சும் பொய் என்அன்பும் பொய்
ஆனால் வினையேன் அழுதால் உன்னைப் பெறலாமே”  என்றார் மாணிக்கவாசகர்.

அந்த இறைவன் மலர் மாலையை உகக்கிறான். மலர் மாலையினும், பாமாலை உகக்கிறான். பாமாலையினும், பக்தர்களின் கண்ணீரை உகக்கிறான்.

அவன் பதம் தேடி, அழுத கண்ணீரால் செய்த பாமாலையை, இந்தக் கண்ணீர் மாலையை நிச்சயம் உகப்பான் என்றுதான் தோன்றுகிறது.

பெரியவா சரணம்.

அழுதால் உன்னையே பெறலாம் என்றாரே

கெழுதகைப் பெரியோரும்; நாளெலாம் உனையெண்னி

அழுவதே வாழ்வாகக் கொண்டேனைக் காவாயோ

பழுதிவன் என்னாமல் வந்து (1)

ஒரு சேய் அழுகைக்கு இரங்கியே   நீயன்று

பெருமுலை அமுதூட்டி நின்றனை இன்றிந்த

சிறு சேய் அழுகைக்கிரங்காயோ? உன்மனம்

உருகாதோ கண்ணீரைக் கண்டு (2)

உன்பதம் கண்ணீரால் அலம்பிட அருள்வாய் நீ

என்றெங்கள் பெரியோரும் சொன்னாரே! பிறைசூடி!

மன்றாடும் உமைநேசா! அழுகையாம் ஆற்றிலே

கன்றிவன் கரைவதும் பார் (3)

பதமதை மலரினால் அருச்சனை செய்வதின்

இதமதாம் கண்ணீரும் உனக்கென்றார் பெரியோரும்

சதமுமே கண்ணீரால் உன்பாதம் நனைத்தேங்கும்

அதமனை வந்து நீ கா (4)

நித்தமும் தண்ணீரால் அபிஷேகம் செய்வதின்

வித்தகா கண்ணீரை உவப்பாய் நீ என்பாரே

சித்தமும் சோர்ந்திங்கே கண்ணிரு குளமானேன்

அத்தனே வந்தென்னைக் கா (5)

பாவியேன் நானுமென் நெஞ்சுமே பொய் ஆனால்

மேவியே உன்பதம் அழுதிட்டால் பெறலாமென்

றாவியே அன்றுமா ணிக்கவாசகர் சொன்னார்!

தாவியே வந்தென்னைக் கா (6)

புலம்பலால் அருச்சனை செய்தனன் கண்ணீரால்

அலம்பினன் நின்பாதம் தாய் தந்தை குரு எந்தன்

உலகெலாம் நீ இங்கே உனைத்தேடி நின்றேனென்

குலம் வாழ வந்தென்னைக் கா (7)

கங்கையைச் சடையினில் தாங்கினை அவள்வேகம்

மங்கிடும் என் கண்ணீர் முன்னாலே நிற்காமல்

பொங்கிடும் அழுகையால் நீராட்டி நின்றேனை

இங்குடன் வந்து நீ கா (8)

அடியார்கள் அழுதிட்டால் அவனியே தாங்காது

அடியேனும் அழுதேங்க அதை நீயும் பார்ப்பாயோ?

அடித்திட்ட அடி போதும் பதமென்னும் அருள் தந்து

கடிதேகி வந்தென்னைக் கா (9)

உண்ணாமல் உறங்காமல் உன்பாதம் நினைத்துன்னைக்

கண்ணீராம் வென்னீரால் அபிஷேகம் செய்பவனை

 “கண்ணே என் மணியே என் குழந்தாய் நீ” எனக் கொஞ்சி

நண்ணி வந்துன்பதம் தா (10)

19.11.17 : அனுஷ தினம்

19.11.17 : அனுஷ தினம் :

இன்று, அனுஷம். பெரியவா பக்தர்கள் கூடி, அந்த சங்கர தெய்வத்தை ஆராதிக்கும் தினம்.

இன்றைய தினத்திலே, அந்த கயிலாய சங்கரன், இந்தப் புவி மிது இறங்கிக் காஞ்சி சங்கரனாய்த் திகழ்ந்ததன் காரணம் என்னவாய் இருக்குமென்று சற்றே வேடிக்கையாய் நினைக்கத் தோன்றியது.

“தந்தை தாயிருந்தால், உலகத்தில் உமக்கிந்தத் தாழ்வெல்லாம் வருமோ ஐயா” என்றும், “ஏன் பள்ளி கொண்டீரய்யா” என்றும், ஸ்வாதீனமாக அந்த பக்தப் பராதீனனைப் பாடுவது மரபுதானே? அந்த மரபினை ஒட்டி, எங்கள் உம்மாச்சித் தாத்தாவாம் இந்த சங்கரனாக – அந்த சங்கரன் அவதாரம் செய்ததை, நிந்தாஸ்துதிபோல் பாடிய பாடலை, அவரது திருவடிகளிலேயே சமர்ப்பிக்கிறேன்.

பெரியவா சரணம்.

உன் இடம் தனதாகப் பெண்ணவள் தானேக,

தன் இடம் விட்டிங்கு தரைமீது வந்தாயோ? (1)

தலையேறி மனைவிசெய் கொடுமையே தாளாமல்

மலைவிடுத்தவனியில் தனியாக வந்தாயோ? (2)

குமரனும் கோபத்தில் ஆண்டியாய் ஆனதில்

விமலனே நீயுமே அவனைப்போல் வந்தாயோ? (3)

பித்தனே என்றுந்தன் பக்தனும் ஏசிட

அத்தனே நீயுமே முக்தனாய் வந்தாயோ? (4)

செருப்பதை பக்தனுன் மேனியில் வீசிட

விருப்பெலாம் விட்டு நீ உலகினில் வந்தாயோ? (5)

வில்லினால் விஜயனும் அடித்ததால் நொந்தங்கு

நில்லாமல் காஞ்சியில் இளைப்பாற வந்தாயோ? (6)

மண்சுமந்தயர்ந்த நாள் வாங்கிய பிரம்படிப்

புண்ணுமே ஆற்றிட மறுபடி வந்தாயோ? (7)

மதனையே எரித்தும் நீ குடும்பியாய்ப் போனதை

நிதமுமே நினைத்திங்குத் துறவியாய் வந்தாயோ? (8)

சதியவள் தந்தையும் மதிக்காமல் போனதால்

இதயமே நொந்து நீ இறங்கியே வந்தாயோ? (9)

அடியவர்க்கென்றுமே அருள்மழை பொழியவே

கடிநகர் காஞ்சிக்கு விரைந்து நீ வந்தாயோ? (10)

சங்கரா! நீ இங்குப் “பெரியவா” என வந்த

மங்கலம் தனை நிந்தாஸ்துதியாகப் பாடியதை

“சங்கடம்” என உதறித் தள்ளாமல் நீ ஏற்பாய்!

பங்கய மலர்ப்பாதம் தந்தென்னைக் காத்திடுவாய்!

30.9.17 : விஜயதசமி நாள் : ஏன் பள்ளி கொண்டீரயா? பொன்னய்யா

30.9.17 : விஜயதசமி நாள்

சில நாட்களுக்கும் முன்னால், “ஏன் பள்ளி கொண்டீரய்யா” என்ற அருணாசலக் கவிராயரின் பாடல் கேட்டேன். 

NC வசந்தகோகிலம் அவர்களின் அழகிய குரலிலே, இந்தப் பாடலைக் கேட்ட யார்தான் மயங்காமல் இருக்க முடியும்? (இந்தப் பாடலைப் பாடாத வித்வான்களே இல்லை!!) 

பாடல் கேட்கும்போதே, சயனித்துக் கொண்டிருக்கும் இந்த photo பெரியவாளையும் நினைத்துக் கொண்டேன்.

அத்தோடு, இந்தப் பாடலைப் பற்றி, வரி வரியாக - வார்த்தை வார்த்தையாக explain பண்ணி, பெரியவா சொன்ன அர்த்தமும் (பார்க்க : http://www.kamakoti.org/tamil/7dk200o.htm) நினைவுக்கு வந்தது.

அந்த அரங்கன் பள்ளி கொண்டாற்போல, பெரியவா பள்ளி கொண்டதற்கும் ஏதும் காரணம் இருக்குமோ? என்ன காரணம் இருக்கும்? அடியேன் மனதில் எழுந்த இந்த சிந்தனையில் விளைந்த காரணங்களை “ஏன் பள்ளி கொண்டீரய்யா” மெட்டிலேயே முடிந்தவரை புனைய முற்பட்டேன்…

அருமையான இந்தப் பாடலை என் இஷ்டத்திற்குக் கையாண்டதற்காக அருணாசலக் கவிராயர் என்னை மன்னித்தருள வேண்டும். இப்படியெல்லாம் என் இஷ்டத்திற்குத் தன்னைப் பாடுபொருளாக்கிப் படுத்தியதற்காக, பெரியவாளும் அடியேனை மன்னிக்க வேண்டும்!

பெரியவா சரணம்.

******************************************************************************************

ஏன் பள்ளி கொண்டீரயா? பொன்னய்யா…

ஏன் பள்ளி கொண்டீரய்யா? (ப)

ஓரிருக்கை எனும் அழகிய தலத்திலே

அழகொளிர்ந்திடும் பாலாற்றங்கரையிலே (அப)

பந்தபாசம் அறுத்ததற்கோ?

தாய் தந்தை சொந்தம் விடுத்ததற்கோ?

காவி பூண்டு நின்றதற்கோ?

குருநாதன் தன்னை இழந்ததற்கோ?

 

வேதபாடமெலாம் முற்றும் கற்றுணர சற்றுழைத்த இளைப்போ?

வேதபாடமதைச் சொன்னவர்க்குப் பொருள் சொல்லிநின்ற இளைப்போ?

காடுமேடெலாம் நடந்து பாரதம் சுற்றி வந்த இளைப்போ?

காசினிமேல் நம் சாத்திரங்களை நிலை நிறுத்தும் இளைப்போ?

விரதக் களைப்போ? பூஜை நித்தம் செய்து வந்த இளைப்போ?

மடத்தை நடத்தி அலுத்தோ? உடலை வருத்திக் களைத்தோ?

நிதமும் நன்மை என்னவென சொல்லி அலுத்ததோ?

மௌனநாடகமும் பண்ணி அலுத்ததோ? (ச)

காஞ்சியிலே வரும் களையோ? சிதைந்த எம்

பண்பைத் திருத்தும் பெரும் களையோ?

வாஞ்சையால் வரும் களையோ? எம்மைக்

காக்கவந்த பெரும் களையோ?

காபி அரக்கனையும் பட்டுபகட்டினையும் ஓட்டி அலுத்தீரோ?

பசுக்கள், வேதியர்கள் பக்தர் கூட்டம்தனைப் காத்து அலுத்தீரோ?

துதிசெய் அடியவரைக் காக்கவேண்டி விழி பூத்து அலுத்தீரோ?

கலிசெய் கொடுமைதனை மாற்றி நன்மையெலாம் சேர்த்து அலுத்தீரோ?

மரபைக் காத்தோ? தருமநெறி ஒன்றே பார்த்தோ?

பவவினைகள் தீர்த்தோ? தெய்வக் குரலை வார்த்தோ?

அடியவருக்காய் ஜகத்குருவாய் நெறி சொல்லி அலுத்ததோ?

நித்தநித்தம் தவம் செய்து அலுத்ததோ?  (ச)

25.09.2017 : அனுஷ நன்னாள் : "பெரியவா நவரத்தின மாலை"

25.09.2017 : அனுஷ நன்னாள்

இன்று அனுஷ நன்னாள். நவராத்திரியும் அனுஷமும் கூடி வந்திருக்கும் இந்த நன்னாளிலே, “லலிதா நவரத்தின மாலை” பாடலின் மெட்டிலே பெரியவாளுக்கு ஒரு நவரத்தினப் பாமாலை சாற்றத் தோன்றியது.

ஒரு கூழாங்கல் கூடப் பெறாத இந்தப் பாடலை, என் ஆசைக்காக “நவரத்தின மாலை”யாக பெரியவாள் மேல் சாற்றுகிறேன்.

பெரியவா சரணம்.

**************************************************

கணபதி காப்பு

ஆனை முகனே சரணம் சரணம் ஆறு முகனே சரணம் சரணம்

ஞான குருவே சரணம் சரணம் தாயும் நீயே சரணம் சரணம்

நாவொன்றிதனால் நாளும் பொழுதும் , பாமாலைகளால் கருணைக் கடலாம்

தேவன் பதமே தொழுதே அழுது பாடும் பணியே பணியாயருள்வாய்

குருநாதா நின் திருவடி சரணம்! குருநாதா நின் திருவடி சரணம்!

குருநாதா நின் திருவடி சரணம்! குருநாதா நின் திருவடி சரணம்!

1. வைரம்

முதலும் முடிவும் இடையும் நீயே பிறப்பும் இறப்பும் வாழ்வும் நீயே

பதமும் பொருளும் குணமும் நீயே படைப்பாய் அழிப்பாய் காப்பாய் நீயே

பதமலர் தனிலே ஒன்றிடுமாறு, வைர நெஞ்சம் தருவாய் நீயே

பதறும் வாழ்வினில் நிம்மதி தருவாய், குருநாதா நின் திருவடி சரணம்!

2. நீலம்:

ஏலவார் குழலி காஞ்சித் தாயின் பாலனாக வந்தோன் சரணம்

மூலப் பொருளே மறையும் தேடும் ஞானப் பொருளே சரணம் சரணம்!

ஆலம் உண்டான் வடிவே சரணம் நீல கண்டன் உருவே சரணம்

பாலக் கண்ணன் நீயே சரணம்! குருநாதா நின் திருவடி சரணம்!

3. முத்து:

முத்தேவரும் இணைந்தோருருவாகவே வையம் காக்கவே வந்தோன் சரணம்

பித்தேறியயிவ்வுலகை மாற்ற, சித்தன் வடிவில் வந்தோன் சரணம்

எத்தேவரும் போற்றிடும் கழலிணைகள், நோக நடந்திங்கு வந்தோன் சரணம்

அத்தா அபயம் தருவாய் வருவாய், குருநாதா நின் திருவடி சரணம்!

4. பவழம்

செக்கச் சிவந்த பதக்கமலங்கள் பக்தர் மனம் ஒளிர் செம்பவழங்கள்

துக்கமகற்றிடும் மனதினில் தூய சுத்தியளித்திடும் நித்தமும்தாமே!

எக்கணமும் தனை நினைத்திருப்போர்க்கு நற்கதி தந்திடும் பொற்கமலங்கள்

இக்கணம் என்னையும் காத்திட வருமோ? குருநாதா நின் திருவடி சரணம்!

5. மாணிக்கம்

எங்கும் நிறைந்ததோர் இறையுமிப்புவியில் வந்து நடந்ததோர் அற்புதம் நீயே!

பொங்கிடும் அன்பினோர் பூரணம் நீயே எங்களை வாழ்விக்கும் இன்னருள் நீயே

திங்களொடிரவியைக் கண்களாய்க் கொண்டாள் நெற்றியில் குங்கும மாணிக்கம் நீயே

பங்கயக் கனிமுகம் காட்டிடுவாயே! குருநாதா நின் திருவடி சரணம்!

6. மரகதம்

பரமன் வடிவே சரணம் சரணம்! அருள்நிதி அமுதே சரணம் சரணம்

நரனுரு ஹரனே சரணம் சரணம்! கருணையாம் கடலே சரணம் சரணம்!

மரகதவல்லியின் மகனாய் வந்த அரிதிரு மருகா சரணம் சரணம்

கரமலராலே வரமது தருவாய், குருநாதா நின் திருவடி சரணம்!

7. கோமேதகம்

விதியோ? வினையோ? வினையின் பயனோ? கதியே அறியேன் கலங்கத் தகுமோ?

சதியால் நமனும் எனையே விழுங்க விடுவாயோ நீ குஹனே சரணம்!

சதிஉத்தமிபா லகனே சரணம்! கோமேதகமே குமரா சரணம்!

நதிபுத்திரனே சரணம் சரணம்! குருநாதா நின் திருவடி சரணம்!

8. பதுமராகம்

ஞாலம் தொழும் உயர் சீலனே சரணம் ஆலமர்ந்தருள் குருநாதனே சரணம்

காலனைக் கடியும் காலனே சரணம்! மாலயன் அறியா ஜோதியே சரணம்

வேலவன் தாயவள் பார்வதி பதும ராகவிலாஸினி ரூபனே சரணம்!

ஓலமிட்டழுதிடும் அடியனைக் காப்பாய், குருநாதா நின் திருவடி சரணம்!

9. வைடூரியம்

கலைமாமதியை முடிசூடிடுவாய், நிலையாய் மதனுக்குயிரே தருவாய்

மலைமாமகள் நீ, கலைமாமகள் நீ, அலைமாமகள் நீ அருளே தருவாய்!

சிலையெனக் கரும்பைக் கரம்பிடித்தாளும் காஞ்சித் தாயே! மலரடி சரணம்!

விலையேதுமிலா வைடூரியமே! குருநாதா நின் திருவடி சரணம்!

பயன்

தினம்தினம் பெரியவா பதமலர் தொழுது நவரத்தினபா மாலையை நவில்வார்

சினமுடன் அறுபகை வென்றிடுவாரே! புகழ்பொருள் உயர்நலம் அடைந்திடுவாரே!

குருநாதா நின் திருவடி சரணம்! குருநாதா நின் திருவடி சரணம்!

குருநாதா நின் திருவடி சரணம்! குருநாதா நின் திருவடி சரணம்!