பிறை சடைப் பெம்மான் பூமிப்

பொறைமகள் மகிழ கண்டக்

கறை, சடை, பிறை விட்டெங்கள்

இறைமுனி குருவாய் வந்தான்!

ஆஞ்சனேயன் எனும் அற்புதன் : ஹம்ஸா நந்தி : 4/2/23

 பல்லவி:

ஆஞ்சனேயன் எனும் அற்புதன் வரதன்

வாஞ்சையோடு துயர் தீர்த்திடும் அழகன்

அனுபல்லவி

பாடிக் கேட்கும் வரம் யாவையும் தருவான்

நாடிடும் அடியவர்க்குறு துணையாவான்

சரணம்

சுந்தரன் மாருதி ராம நாமமெனும்

மந்திரம் கொண்டு தாய் துன்பத்தைத் தீர்த்தான்

வந்தனை செய்திடும் அடியவர் வாழ்வினில்

சந்ததம் நன்னலம் பொங்கிடச் செய்வான்

சுந்தர ஆஞ்சனேய ஸ்வாமிக்கு சமர்ப்பணம்.

தரிசனம் கண்டேன்

 ராகம்: ஆனந்த பைரவி 

பல்லவி

தரிசனம் கண்டேன் பாத தரிசனம் கண்டேன்

தரிசனன் கண்டேன் ஐயன் தரிசனம் கண்டேன்

அனுபல்லவி

தரிசனம் கண்டேன் கருணை முகமலரை

தரிசனம் கண்டேன் வரம் அருள் கரமலரை

சரணம்

தரிசனம் கண்டேன் காவி உடை பொலிச் சுடரை

தரிசனம் கண்டேன் ஜோதி வடிவாம் மெய்ப் பொருளை

தரிசனம் கண்டேன் வினை கடிந்தருட்கடலை

தரிசனம் கண்டேன் எந்தன் மனம் உறை இறையை

பெரியவா மஹா அனுஷத் திருநாளை ஒட்டி எழுதிய பாடல் : 14/6/22

 ராகம்: ஹிந்தோளம்

பல்லவி:

கயிலை நாதனே மயிலை வாசனே

காபாலியே காஞ்சி காமகோடீஸ்வரனே

அனுபல்லவி

கற்பகம் உடனுறை அற்புதனே காஞ்சி

நற்பதி உறைந்திடும் சந்திரசேகரனே

சரணம்

பற்பல அடியாருன் பொற்பதம் பணிந்திடுவார்

அற்பனும் பணிய வந்தேன் காத்தருள்வாய் ஐயனே

எப்பணி செய்யும்போதும்.....16.8.21 : அனுஷ தினம்

எப்பணி செய்யும்போதும் எங்கு நான் இருக்கும்போதும்

தப்பாது உந்தன் எண்ணம் எனக்குளே இருக்கச் செய்வாய்

இரவு நான் உறங்கும்போதும், மறுபகல் உழலும்போதும்

அரவணி நாதா! உன்தன் நாமம் உள் ஓடச் செய்வாய்

நல்லதாம் நினைவேயின்றி,  தீமையே செய்யும்போதும்

மெல்லவுன் முகமும் இழையாய் என்னுளே தோன்றச் செய்வாய்

 

கண்டதைத் தின்று, பார்த்து, பேசி நான்  நின்றபோதும்

பண்டமிழ்க் கூத்தா! எனையுன் பார்வையில் இருத்திக் கொள்வாய்

 

காமத்தில் அமிழ்ந்து உந்தன் நாமம் நான் மறக்கும்போதும்

காமனை எரித்த கண்ணா! என்னை நீ காத்து நிற்பாய்

எக்குறை நானும் செய்து எவ்விதம் பிதற்றும்போதும்,

அக்குறை, பிதற்றலெல்லாம் உன்பூஜையாக்கிக் கொள்வாய்

என்னையுன் பக்கம் ஈர்க்க என்ன நீ செய்தபோதும்

உன்னைவிட்டோடப் பார்க்கும் அற்பன் நான்; பக்கம் நிற்பாய்!

 

காலமே முடிந்து காலன் கொள்ளவே வந்தபோதும்

காலனை முடித்த காலா! எனையுந்தன் பதமே கொள்வாய்

 

 

 

 

 

 

 

வெண்மதிக் கொழுந்தொன்று சூடும் - 14.8.21

வெண்மதிக் கொழுந்தொன்று சூடும்

தண்புனல் சடைகொண்டு ஆடும்

கண்நுதல் இறைவந்து இந்த

மண்ணதில் நடை பயின்றானே!

 

கொன்றை அம்மலர் ஒன்று சூடும்

மன்றதில் சதிர் ஒன்று ஆடும்

என் இறை ஜகம் நன்கு வாழ

நன்னகர் காஞ்சி வந்தானே!

 

மிடறதில் கறைகொண்ட பெம்மான் 

சுடரெனப் பொலிகின்ற எம்மான்

தடமுலைத் தையலும் தானாய்

இடர் களைந்திருள் நீக்கினானே!

 

புரம் மூன்றெரித்திட்ட தேவன் 

சிரமொன்று கொய்ந்திட்ட நாதன்

வரம்போல மனிதனாய் மண்ணில்

அரனவன் இறங்கி வந்தானே!

 

 

 

 

 

 

உனைக் கண்டு உருகாத......சிவரஞ்சனி 13.08.2021

உனைக் கண்டு உருகாத......சிவரஞ்சனி 13.08.2021

பல்லவி: 

 உனைக்கண்டு உருகாத, நெகிழாத மனம் கொண்ட 

எனைப்பாராய் என் ஐயனே! 

 

அனுபல்லவி: 

கருணைக் கடல்வெள்ளம் பெருகும் உலகெங்கும்! 

பருகிக் களிக்காதென் மூட மட நெஞ்சம்! 

 

சரணம்: 

தருணம் ஈதென்றுன் சரண மலர்பற்றி

வருவார் அடியாரும்; வினையேன் விழையேனே! 

 

குருவின் மலர்ப்பாத பெருமை அறியாத, 

கருமை மனத்தேனென் சிறுமை பொறுத்தென்னைக் 

 

கொஞ்சம் பாராயோ? அருளும் தாராயோ? 

கொஞ்சும் தாயாய் நீ இங்கே வாராயோ?

Guruvaram songs

8.8.19

சக்தி நாயகன் நீ என்று அறிந்திடும் அறிவு கேட்டேன்

பக்தியால் உருகி உன்னைப் பற்றிடும் நெஞ்சம் கேட்டேன்

எக்கதி ஏதும் இல்லேன்; உன்மலர்த் தாளே இங்கு

திக்கெனக்கென்று வந்தேன் பதம்சதம் அருள்வாயப்பா

 

15.8.19

மடையிலி வெள்ளம் போலக் கருணையே அளிக்கும் பாதம்

குடையென என் சிரத்தில் கொள்ளவே ஓர் பேராசை!

கடையனென் மடியில் உந்தன் பதமலர் வைத்து எங்கும்

நடையாக நடந்த பாதம் பிடிக்கவே ஓர் பேராசை!

26.12.19

குருவருள் துணைவரின் கொடியவை தொலைந்திடும்

குருவருள் அணைதரின் காலனும் கைதொழும்

குருவருள் உடன்வரின் வினையெலாம் வற்றிடும்

குருவருள் ஒன்றினால் பிறவியும் போகுமே

2.1.2020

குவளையாம் கண்கள் கண்டேன்; கடல்போலக் கருணை கண்டேன்

பவளம்போல் மேனி கண்டேன்; பவவினை அழியக் கண்டேன்

துவராடை இடையில் கண்டேன்; துயரெலாம் நீங்கக் கண்டேன்

தவராஜன் பாதம் கண்டேன்; வேறெதும் வேண்டா நின்றேன்

9.1.2020:

உன்னையே காணும் பேற்றை, வேறெதும் காணாப் பேற்றை,

உன்னையே நினைக்கும் பேற்றை, வேறேதும் நினையாப் பேற்றை,

உன்னையே எனக்குள் கொள்ளும் அப்பேற்றை மட்டும் என்றும்

உன்னிடம் கேட்டு நின்றேன்; தந்தருள் புரிவாய் ஐயா!

16.1.2020:

விடையது ஏறும் பெம்மான் வடிவமாய் வந்தோன் நாமம்

இடை முதல் ஈறு என்ன எல்லாமாய் ஆனோன் நாமம்

கடையவன் எனக்கும் இங்கே நற்பதம் அளிக்கும் நாமம்

விடையதாம் பவப்பிணிக்கு, பெரியவா என்னும் நாமம்

23.1.2020

பொழிற் சோலை பூத்திருக்கும் பங்கயத்துப் பதமலர்கள்

எழிற் காந்தி சுடரொளியாய் மின்னிடுமம்மேனியொளி

தொழும்கைகள் வாழ்ந்திடவே வாழ்த்திடுமக் கரமலர்கள்

அழுமுன்னே ஓடிவந்து அரவணைக்கும் கருணைமுகம்!

9.7.20

அற்புதத் திருவடி அற்புதன் திருவடி

கற்றவர் தொழுதிடும் கற்பகத் திருவடி

சொற்பதம் கடந்தவன் நற்பத மலரடி

உற்றவர்க்கருளிடும் நற்கதி உய்த்திடும் 

எக்காலம் : 17.8.19

உன் நினைவாயிருந்து உனக்காகவே வாழ்ந்து 

உன் நாமம் என் மூச்சு என்றாவதெக்காலம்?

உன்னடியார் பாதம் என் க்ரீடமாயிருந்து

என்னாளும் சத்சங்கம் என்றாவதெக்காலம்?

பொன்மேனி ஒளிவடிவை எப்போதும் என்னகத்தில்

கண்ணாரக்கண்டு மனம் களித்திருப்பதெக்காலம்?

தென்னாடுடைய சிவன் என்னாட்டவர்க்குமிறை

உன்னோடு நானிருந்து உனதாவதெக்காலம்?

வேரோடு வினைதீர்க்கும் பெருங்கருணைப் பேராற்றை

சேராதிருக்குமெந்தன்  வினைதீர்வதெக்காலம்?

அன்புருவாம் உன்னை அனுதினமும் அர்ச்சிக்கும்

இன்பத்தில் என்னை இழந்திருப்பதெக்காலம்?

விதியாலே விளைந்த உயிர் இதனை உன் பாதமதே

கதியென்று சமர்ப்பித்து நிறைந்திடுவதெக்காலம்?

ஓரிக்கை வந்தமர்ந்த ஓருருவை என்னுளத்தில்

வாரித்தொகுத்திழைத்துக் களிகூர்வதெக்காலம்?

கஞ்சி நகர் வளர் கருணைக்கடலை நித்தம்

கொஞ்சிக்கொஞ்சி உயிர் உருகிடுவதெக்காலம்?

பிறவிப் பிணி தீர்க்கும் பேரன்பின் பதம்சேர்ந்து

உறவு நீ ஒன்றே என்றிருப்பதெக்காலம்? 

பிறை சூடிப் பெரியவா அஷ்டகம்: : 6.7.19

பிறை சூடிப் பெரியவா அஷ்டகம்:

வெண்ணிலா சடையில் வைத்தான்

பெண்ணிலா உடலில் வைத்தான்

எண்ணிலா இன்பம் வைத்தான் 

பெரியவா என்னும் பேரான் (1)

பிறை நிலாப் பெயரான் சற்றும்

குறை நிலாப் பெயரான் உமையாள்

பிறை நிலா நுதலாள் பாகன்

பெரியவா என்னும் பேரான் (2)

திரை நிலா உடலான் என்றும்

நரை நிலாச் சடையான் பாதம்

தரை நிலா அமரர் போற்றும்

பெரியவா என்னும் பேரான் (3)

ஆணிலான் பெண்ணிலான் காண்

தூணிலா அரியும் அயனும்

காணிலாச் சோதியான் காண்

பெரியவா என்னும் பேரான் (4)

ஊணிலான் பிச்சை கொள்வான்

நாணிலான் ஆடை ஏதும்

பூணிலான் பித்தனாம் காண்

பெரியவா என்னும் பேரான் (5)

வானிலாச் சடையான் கங்கை

தானிலாச் சடையான் மங்கை

தேனிலா முகத்தாள் பாகன்

பெரியவா என்னும் பேரான் (6)

 

துண்ணிலா அணியான் நித்தம்

தண்ணிலாச் சொல்லான் தீதே

பண்ணிலான் தூயான் சீலன்

பெரியவா என்னும் பேரான் (7)

மாணிலா எந்தன் தீமை

பேணிலான் செய்த குற்றம்

காணிலான் நன்றே கொள்வான்

பெரியவா என்னும் பேரான் (8)

குறை நிலாப் பெயரான் : குறை நிலா = குறையேதும் நிற்க முடியாத

பிறை நிலா நுதலாள் பாகன் : நுதலாள் = பிறை நிலா போல் நெற்றி உடையவள்

திரை நிலா உடலான் (திரை = உடல் சுருக்கம்; உடல் சுருக்கம் விழா இளமை)

நரை நிலாச் சடையான் (நரை = முதுமை, வெளுத்த முடி; நிலா = நில்லாத)

தரை நிலா அமரர் போற்றும் (தரை நிலா = தேவர்களுக்கு, பாதம் தரை தொடாது)

ஆணிலான் பெண்ணிலான் காண் (ஆணுமில்ல; பெண்ணுமில்லை)

தூணிலா அரியும் அயனும் (தூணிலா = தூணில் நில்லாத அரி - நரசிம்மம்)

ஊணிலான் பிச்சை கொள்வான் (ஊண் = உண்பது)

நாணிலான் ஆடை ஏதும் நாண் இலான் = வெட்கம் இல்லாதவன்)

தானிலாச் சடையான் (தானிலாச் சடையான் = கங்கை தங்காத சடையான்)

துண்ணிலா அணியான் (துண்ணிலா = துண்டான நிலா; பிறை நிலா)

தண்ணிலாச் சொல்லான் (தண்ணிலா = குளுமையான நிலா)

மாணிலா எந்தன் தீமை (மாணிலா = மாண் + இலாத = நாகரீகம் இல்லாத)

பேணிலான் செய்த குற்றம் (பேணிலான் = கருத மாட்டான்)

மணிவாசக பஞ்சகம் 6.7.19

மணிவாசக பஞ்சகம் (தலைப்பு : நன்றி : கார்த்தி நாகரத்தினம் அண்ணா, பெங்களூரு)

மாணிக்கவாசக நின் பக்தியெனும் மாற்றில்லா

ஆணிப்பொன் மாளிகையின் ஓர் துரும்பை பக்தன்போல்

நாணின்றி நடித்திடுமிப் பதருக்கும் தந்திடுவாய்

வேணிச்சந்திரன் சூடி பதம்காணும் வழி சொல்வாய் (1)

திருவாசகம் தந்து உலகோரை உய்விக்கும்

குருவாசக! இந்தக் கல் நெஞ்சுக் கடையேனுக்கு

ஒருவாசகம் தாராய்! உருகாத குறை தீராய்!

கருவாசம் தீர்த்தாளும் கழல் சேரும் வழி கூறாய் (2)

சதுரனார் எனக்கேட்டு சங்கரர்க்குத் தனையீந்த

மதுரவாசக! உந்தன் அனுபூதிப் பெருநிலையின்

மதுவெள்ளத்தோர் சொட்டை நாயேனுக்கருளிடுவாய்

நதிசூடி அவன் தாள்சேர் ஆறதுவும் அருளிடுவாய் (3)

முந்தை வினைமுழுதும் ஓயும் உரைசெய்திங்கு

எந்தை சிற்றம்பலவன் இணயடிவாழ் வாசக! நின்

சிந்தையிலே ஓர் நொடியித் தீயவனை நினைத்திடுவாய்!

விந்தையருள் வித்தகனின் தாள்சேரும் வழி சொல்வாய் (4)

திருவாதவூர் தோன்றி, திருவாசகம் சொல்லி

திருச்சிற்றம்பல வாணன் தாள்வாழும் மறையோனே

ஒருபோதும் உனைக்கல்லா வினைதீர்ந்து அடியேனும்

ஒருபோதும் பிறவாதான் பதம்சேரும் வழி சொல்வாய் (5)

Anusham : 16.06.2019

Anusham : 16.06.2019

நிதம் நாடு நகரமெல்லாம் சுற்றிவந்தடியாருக்கு

சதமருள் மலர்கள் கண்டேன்; அருளுமம்மலர்கள் நாதன்

பதமலர் என்றும் கண்டேன்; இதமருட் பதமே என்றும்

கதியெனக்கென்றும் கண்டேன்; கழலிணை பணிந்தேனையா!  (1)

அருள்மலை ஒன்றை வையம் யாவைக்கும் தாயாம் உண்மைப் 

பொருள்மலை ஒன்றை, துன்பம், படுதுயர், சோகமென்னும்

இருள்மலையெல்லாம் போக்கும் ஜோதியாம் மலையைத் தூக்கி

வரும் பத மலர்கள் கண்டேன்; கழலிணை பணிந்தேனையா (2)

அறம் பொருள் இன்பம் வீடு அனைத்தையும் அருளும் ஞானத் 

துறவினோர் ஒளியை, எந்தன் தாயொடு தந்தையான

உறவதை, எந்தன் நெஞ்சில் வாழ் துவராடை வேந்தை

பிறப்பறுப்பானைக் கண்டேன்; கழலிணை பணிந்தேனையா! (3)

பவரோகம் தீர்த்து ஆளும் பிஞ்சகப் பெம்மான் தன்னை,

சிவமதை,  அரையில் பூண்ட துவராடை தன்னை நித்தம்

நவநவக் கோலம் காட்டும் மதிபுனற்சடையன் தன்னை

உவந்தெனதுளமே கண்டேன்; கழலிணை பணிந்தேனையா! (4)

வந்திடும் அடியார்க்கெல்லாம் வரமருள் தேவை, நெஞ்சில்

சிந்தனை செய்தோர்க்கெல்லாம் நலமருள் கோவை, நாளும்

வந்தனை செய்வோர் வாழ்வில் ஒளியதாம் ஜோதி தன்னை

எந்தையைக் கண்டேன் உந்தன் கலழிணை பணிந்தேனையா! (5)

கரமலர் தன்னை, நாயிற் கடையனாம் எனக்குமிங்கே

வரமருள் ஹஸ்தம் தன்னை, மெய்யடியாரை வாழ்த்திப்

பரமதும் நல்கும் பேற்றை,  கருணையாம் ஊற்றை,  கஞ்சி

வரதனைக் கண்டேன் அந்தக் கழலிணை பணிந்தேனையா! (6)

அமுததாம் தவத்தை, வாக்கை, உளமுடல் எல்லாமிங்கே

நமக்கென நல்கி நாம்செய் பாவமாம் நஞ்சையெல்லாம்

தமக்கெனக் கொள்ளும் தியாக வேந்தினை, பாகம் வாழும்

உமையவள் தன்னைக் கண்டேன்; கழலிணை பணிந்தேனயா! (7)

நஞ்சுண்ட கண்டன் தன்னை, அரவணி ஈசன் தன்னை

மஞ்சுண்ட கயிலை வாழும் மாமதி சூடி தன்னை,

அஞ்சுண்ட எந்தன் உள்ளம் ஆறுதல் பெறவே வந்த

அஞ்செழுத்தானை கண்டேன்; கழலிணை பணிந்தேனையா! (8)

உலகெலாம் போற்றுமந்த ஒளிமலர் முகத்தைக் கண்டேன்

நலமெலாம் தருமோர் நாமம் சிவமதாய் சிரிக்கக் கண்டேன்

குலம் குணம் செல்வம் தந்து, சீரொடு சிறப்பும் நல்கும்

புலர் கதிர் முகமே கண்டேன்! கழலிணை பணிந்தேனையா! (9)

பொங்கிடும் அன்பு கண்டேன்; பொன்மலர் முகமே கண்டேன்

மங்கலம் பொங்கக் கண்டேன்; முகம் உளம் நிறையக் கண்டேன்

சங்கு சக்கரமும் கண்டேன்! உமையொரு பாகன் கண்டேன்

எங்குமானந்தம் கண்டேன் ; கழலிணை பணிந்தேனையா! (10)

Anusham : 26.2.2019

Anusham : 26.2.2019

அப்பா! நான் உன் குழந்தை இல்லையோ? குழந்தை அப்பா அம்மாவை விட்டுவிட்டு இங்கே அங்கே ஓடிக்கொண்டுதானே இருக்கும். தாய் தந்தையர் தானே கவனமாகப் பார்த்துக் கொள்ள வேணும்? 

சின்னஞ்சிறு குழந்தையது தாயவளை விட்டு புறம்

   ஓடுவதுபோல் நானும் ஓடிடுவேன்! முக்கண்ணா!

என்னுயிரே! ஆரமுதே! தாய்தந்தை ஆனவனே!

   மதலையிவன் பக்கம் நீ விட்டுவிட வேண்டா கேள்!

 

அறியாத பிள்ளையது விளையாட்டு பொம்மையதை

    கண்டவுடன் தாயவளை விட்டகன்று போவாற்போல்

சிறியேனும் வாழ்வினிலே சிறு இன்பம் தனைத்தேடி

     புறம்போகும் வேளையெனை விட்டுவிட வேண்டா கேள்!

 

நெருப்பதனை அழகான பொருளென்று தொட்டுவிட

      சிறு பிள்ளை நெருங்குவது போல் நானும் வாழ்வினிலே

அறுபகைவர் பின்னாலே அலைகின்றேன் எண்தோளாய்!

      எனைவிட்டு எங்கும் நீ போகாதே சொன்னேன் கேள்!

 

உனையென்றும் அகம்தன்னில் வைத்துந்தன் பாதமலர்

       அதைப்பற்றி வாழ்கின்ற அடியாரோ டிணங்காமல்

மனை, மக்கள் என வாழ்வில் புறம்போகும் சிறுவனெனைக்

         கைவிட்டு வேறெங்கும் போகாதே! சொன்னேன் கேள்!

08.01.2019 : பெரியவா மறைந்த (english) தினம்

08.01.2019 : பெரியவா மறைந்த (english) தினம்

இன்று, பெரியவா மறைந்த - English Date. இன்றும் என்றும், பெரியவா நம்முடனேதான் இருக்கிறார்கள். ஆனாலும், பூத உடலுடன் பெரியவா நம்முடனே, நம்மருகே இருந்த அந்த நாட்கள் மீண்டும் வராதா என்ற ஏக்கம் எல்லா பக்தர்கள் மனதிலும் இருப்பது இயற்கைதான்.

என் மனதின் அந்த ஏக்கத்தினை, இந்தப் பாடலாக வடித்து, பெரியவாளின் பதமலர்களில் சமர்ப்பிக்கிறேன்.

உன்னருகில் நானிருந்து, உன்வதனம் பார்த்திருந்து
உன்மொழியே கேட்டு நிதம் உருகுவதும் எக்காலம்? (1)

கண்ணாலே காண்பதுவும் வாயாலே பேசுவதும்
எண்ணத்தில் எண்ணுவதும் நீயாவதெக்காலம்? (2)

சிந்தையெலாம் நீயாக, எந்தையுனையே நினைத்து
விந்தையுலகை விலக்கி வாழ்வதுமே எக்காலம்? (3)

எந்தனிரு விழிகளிலே உன்னுருவையே எழுதி
சுந்தரனே உனையென்றும் காணுவதும் எக்காலம்? (4)

உன்னருளால் உனையெண்ணி, உன்பதமே நான் பணிந்து
உன்னுருவை என்னுயிரில் எழுதுவதும் எக்காலம்? (5)

உனைப்பாடும் வேலையதே வேலையதாய் இருக்க மறு
நினைவெதுவும் இன்றி இனி இருப்பதுவும் எக்காலம்? (6)

உன் கோடி வார்த்தையிலே ஒன்றினையாயினும் நானிங்கு
என் வாழ்வின் வேதமெனக் கொள்வதுவும் எக்காலம்? (7)

உன் நாமம் மொழியாக, உன்னருளே வழியாக
உனபதமே கதியாக வாழுவதும் எக்காலம்? (8)

03.01.2019 : அனுஷ நன்னாள்

03.01.2019 : அனுஷ நன்னாள்

பெரியவாளின் இந்த அனுஷ நன்னாளிலே, பெரியவாளிடம் எந்த மாதிரியான பக்தி பாவம் எனக்கு இருக்கிறது என்று யோசித்துக் கொண்டிருந்தேன்.

பக்தி இருக்கிறதா என்பது முதல் கேள்வி. பக்தியெல்லாம் ஒன்றும் இல்லை என்பதுதான் honest ஆன பதில். குருவாக, தெய்வமாகக் கொண்டாடப்படும் அந்தப் பெரியவாள் என் கண்களுக்கு, அகத்தில் இருக்கு ஒரு அன்பான தாத்தாதான்.

தாத்தாவிடம், பேரனுக்கு என்ன இருக்கும்? பக்தியா இருக்கும்? இல்லை. பாசம் இருக்கும். சமயத்தில் - especially - தப்பு பண்ணும்போதெல்லாம் - பயமும் இருக்கும்.

தாத்தா என்றால், அந்தப் பேரனிடம் அன்பு காட்டவேண்டாமோ? அன்பு காட்டுவது என்றால், பேரக் குழந்தையை மடியில் போட்டு அந்தத் தாத்தா சீராட்ட வேண்டாமோ? அப்படியில்லை என்றால் அது என்ன தாத்தா?

பேரக்குழந்தை, விஷமம் பண்ணத்தான் பண்ணும். அதுபாட்டுக்கும் ஓடும். விளையாடும். அடிபட்டால், தூக்கம் வந்தால், பசியெடுத்தால்தான் தாத்தா -பாட்டியிடம் வரும்.

ஐயா, பெரியவாளே! இந்தக் குழந்தையும் அப்படித்தான்....

எத்தனை விஷமம் நான் செய்தாலும், எத்தனை தப்பு பண்ணினாலும், எத்தனை உன்னிடமிருந்து விலகி ஓடினாலும், என்னை இழுத்தணைத்து, உன் மடிமீதிட்டு, அன்பு காட்டி அருள்வாய் ஐயா.....

பெரியவா சரணம்.

"வா" வென்றழைத்தணைத்துன் மடிதாராயெந்தாய் நீயே!

உனையெண்ணி உருகிநாளும் உன்நாமம் சொல்லிச் சொல்லி

                உன்பதம் மேவுமுந்தன் அடியார்கள் இருக்க இங்கே

உனையெந்தக் கணமும் நினையா எனக்குமுன் கருணை காட்டி

                 உன்னடியாரோடிங்குன் பொன்னடி போற்ற வைத்தாய்!

அனைத்துலகுக்கும் தந்தை தாயுமாய் ஆன சோதீ!

                  முவத்து முக்கோடித் தேவர் பதம் பணி ஆதி மூலா!

எனையுமுன் சேயாய்க் கொண்டு, என் குற்றமெல்லாம் நீக்கி                

                  "வா" வென்றழைத்தணைத்துன் மடிதாராயெந்தாய் நீயே!  (1)

குணம் ஒன்றுமில்லேன்; குற்றம் மட்டுமே நிறைந்த நாயேன்

                 இனம் என்றுன் தொண்டர் கூட்டம் சேர்ந்திடா புன்மைப் பேயேன்

பணம் போகம் வாழ்வாய்க் கொண்டுன் பதமென்றும் நினையாத் தீயேன்

                  என்னையும் உந்தன் பாதம் பரவுமோர் பேறு தந்தாய்!

பிணமாக இந்த வாழ்வு முடியுமுன் கருணை கூர்ந்து

                   உன்னைப் பாடிடுமோரந்த வேலையே வாழ்வாய்ச் செய்வாய்!

கண நேரம் என்முன் வாராய் ! காட்சியே தந்து காவாய்!

                     "வா" வென்றழைத்தணைத்துன் மடிதாராயெந்தாய் நீயே!  (2)            

மனமென்னும் பேயால் நானும் படும், பாடறிவாய் நீயும்!

                    உனையெண்ணி உருகா நெஞ்சும், கண்டுநீர் சொரியாக் கண்ணும்

தினமுன்னைப் பாடா வாயும், உன்பதம் பணியா உடலும்

                     கொண்டுவாழ்ப் பதராமெனையும் பதம்தந்து காக்கும் தேவா!

புனம் காத்த வள்ளிமாதின் கரம் கொண்ட குமர வேலா!

                      அலைகடல் நஞ்சை உண்டு அமரரைக் காத்த சீலா!

சினமேதும் இன்றி இந்தச் சேயையும் காக்க வாராய்!

                     "வா" வென்றழைத்தணைத்துன் மடிதாராயெந்தாய் நீயே!  (3) 

காமத்தீ வாட்ட; கோபக் கனலெந்தன் உயிரை வாட்ட

                    ஆதரவு ஏதும் இன்றி ஐயா,  நான் அலைந்த காதை

காமனைத் தீயில் சுட்ட நீ நன்றாயறிந்த ஒன்றே!

                    இதழ்க்கடை சிரிப்பால் அந்த முப்புரம் சுட்ட தேவா!

சாமமே சொன்ன வேந்தன் அவனுக்கும் அருளும் வேதா!

                     காஞ்சி மா நகரில் வாழும் கருணை மாக் கடலே உமையாள்

வாமபாகமதாய்க் கொண்டோய்! கருணை கூர்ந்தருளே தாராய்!

                    "வா" வென்றழைத்தணைத்துன் மடிதாராயெந்தாய் நீயே!  (4) 

                      

பக்தி ஒன்றில்லேன் உன்மேல்; பக்தன்போல் நடித்து நின்றேன்!

                    உன் நாமம் சொல்லக்கூட  அருகதை ஏதும் இல்லேன்!

துக்கமே நிறைந்த வாழ்வை நித்தியம் என்றே கொண்டேன்!

                    திருப்புகழ் செப்பென்றருண கிரிக்கன்றுரைத்த பாலா!                     

முக்குணம் நீக்கி வந்த முழுமுதற் பொருளே! வேலா!

                     திக்குகள் எல்லாம் போற்றும் செந்தில்வாழ் அசுரர் காலா!

சக்தி ஆயுதமே நீக்கி வந்தமால் மருகா! என்னை

                  "வா" வென்றழைத்தணைத்துன் மடிதாராயெந்தாய் நீயே!  (5) 

06.12.2018 : அனுஷ நன்னாள்

06.12.2018 : அனுஷ நன்னாள் : பெரியவா என்னும் பெரு நெருப்பு

இந்த அனுஷ நன்னாளிலே, பெரியவாளை வணங்கி, அந்தப் பெரியவாளின் நாமம் சொல்லப்போய் நான் பட்ட பாட்டை விளக்கி ஒரு பாடலாய் எழுதி, அந்தப் பாடலையும் பெரியவா பாதத்திற்கே அர்ப்பணிக்கிறேன்.

பெரியவா சரணம்.

அரனவன் நாமம் சொல்ல, அழுக்குகள் அழியும்; அந்தப்

பரனவன் பாதம் பற்ற நல்லவை சேரும் என்றெம் (1)

பெரியவர் சொன்னார்; அந்த அரனவன் வடிவேயான

பெரியவா நாமம் சொல்வாய்; நன்மையே விளையும் என்றார்! (2)

நல்லதே நடக்கும் இங்கென்றெண்ணியே நானும் காஞ்சிச்

செல்வனின் நாமம் சொன்னேன்! நடந்த அக்கதையைச் சொல்வேன்! (3)

"முக்கணா! புரமே செற்றோய்! பெரியவா!" என்று சொன்ன

அக்கணம் ஜ்வாலையொன்று நெஞ்சுளே புகுந்ததம்மா! (4)

கரும்பினை சுவைக்க நாவும் நெஞ்சுமே இனிக்கும்; ஜ்வாலை

நெருப்பினை சுவைத்து உண்டால் வாயொடு நெஞ்சும் வேகும் (5)

இரும்பினோர் இதயம் கொண்டேன்; பெரியவா நாமமென்னும் 

நெருப்பினை உண்டேன்; காமக் க்ரோதத்தாலான எந்தன் (6)

நெஞ்சமும் எரிந்ததம்மா! காமனன்றெரிந்தாற்போல

கொஞ்சமும் 'நான்' இல்லாமல் முற்றுமாய் எரிந்தேனம்மா! (7)

எரிவதைத் தடுக்க இங்கே செய்வதென்னென்று கேட்க

'அரியவன் நாமம் சொல்வாய்'! 'காப்பன்' என்றறிந்தோர் சொன்னார்! (8)

'அரியவன் வேறு - எங்கள் பெரியவா வேறு' - இல்லை!

"பெரியவா நாமம் சொல்ல, அரியவன் வருவான்" என்றார்! (9)

நீரினை உண்ட மேக வண்ணமே கொண்டான் நாமம்

வாரியே உண்டேன் - அந்தப் பெரியவா நாமம் சொல்லி! (10)

தீயினை அணைக்க நீரை ஊற்றுவார்; நாம நீரை

வாயினில் ஊற்றி நின்றேன்; நெருப்பினை வளர்க்கும் நீரை (11)

யாரிங்கே பார்த்ததுண்டு? இன்னாம நீரோ அந்தப்

பெரியவா நாமத்தீயை இன்னமும் வளர்த்த்தம்மா! (12)

வளர்ந்த அந்நெருப்பு எந்தன் முன்வினை எல்லாம் சுட்டுக்

கிளர்ந்திடக் கண்டேன்! பின்னர் வரும் ஜன்மம் எல்லாம் சுட்டு (13)

அமைந்திடக் கண்டேனிங்கே 'நான்' இல்லா என்னின் உள்ளே

அமைதியும் நிறைய எங்கும் பெரியவா நிறையக் கண்டேன்!! (14)

14.10.18 : அனுஷ நன்னாள்

14.10.2018 : அனுஷ நன்னாள்:

இந்த நவராத்திரி சமயத்தில், இந்த அனுஷ நன்னாளிலே, அனுஷதேவனை, இந்தப் பாடலால் ஆராதனை செய்கிறேன்.

பெரியவா சரணம்.

காருண்ய மூர்த்தி வந்தார்!!

பத்தவதாரம் செய்து, பூமியே வந்த தெய்வம்

உத்தம முனிவனாக, சங்கர நாமம் தாங்கி

சித்தனாய் வேடம் பூண்டு அவனியே வந்ததம்மா!

பத்தரைக் காக்கவென்று இத்தரை வந்ததம்மா!

ஒன்பது நாட்கள் போரில் அரக்கரை அழித்த தேவி

துன்புற்றுழன்று வாடி அன்னையைத் தேடுமந்த

அன்பருக்காக கைலை நாதனை விட்டு பூமி

தன்பதம் பதித்து வந்தாள்; காவியே உடுத்தி வந்தாள்!

அட்டமா சித்தி என்னும் தேவியர் போற்றும் தேவி

சிட்டரின் வாழ்வு மேன்மையாகிடவென்று,  தீய

துட்டரை அழித்திடாமல் நல்லோராயாக்கவென்று

இட்டமாய்ப் பாதம் வைத்து பாரத பூமி வந்தாள்!

ஏழுலகெங்கும் வாழ காத்தருள் புரியும் ஈசன்

ஊழ்வந்துறுத்தக் கதறி அழுதிடும் மாக்கள் மாற

தாழ்சடை நீக்கிக் கையில் மான்மழுவதுவும் நீக்கி

ஆழிசூழ் உலகம் வந்தான்; காஞ்சிமா நகரம் வந்தான்!

அறுமுகம் கொண்டு சூரர் படைவென்ற தேவன், மாந்தர்

உறுபயம் போக்க வந்தான்; கவலைகள் நீக்க வந்தான்

அறுபகை வென்று வாழும் வகை சொல்ல தண்டம் ஏந்தி

குருவென இறங்கி வந்தான்; குவலயம் வாழ வந்தான்!

பஞ்சமா பொறிகள் வாட்டத் தவித்துடல் நடுங்கி நோயால்

அஞ்சியே அரற்றி வாழும் மாந்தரைக் காக்கத் தாயின்

நெஞ்சுகொண்டிங்கே வந்தான் தரணியைக் காக்க வந்தான்

பஞ்சின் மெல்லடியால் இந்தப் பாரை சீராக்க வந்தான்!

சதுர்வேதம் நொந்து நைந்து  கவனிப்பாரின்றி  வாடி,

விதிதனைத் தொழுதரற்றி அழுதிங்கே நின்றபோது,

மதுசூதன் அன்றோர் நாளில் வேதத்தைக் காத்தாற்போல

மதிசூடன் மறையைக்காக்க அவதாரம் செய்து வந்தான்!

முத்தேவர் சேர்ந்து இங்கே ஒன்றாகிப் புவியைக்காக்க

சித்தனின் ரூபம் கொண்டார்! தீஞ்சுவைத் தமிழில் வேதம்

மொத்தமாய் தெய்வக் குரலில் சொல்லவே வந்தார்; எங்கள்

உத்தமக் குருவாய் வந்தார்! உலகெலாம் உய்ய வந்தார்!

இருவினை அறுத்து மாய இருளினைக் களையும் ஞானத்

திருவென வந்தார்! ஜோதிச் சுடரென வந்தார்! லோக

குருவென வந்தார்! வாழ்வில் நிறையதே நிரம்ப வந்த

அருளென வந்தார்! இறையதாய் இனிதே வந்தார்!

ஓருண்மையன்றி இங்கே வேறுண்மையில்லை யென்னும்

பேருண்மை சொல்ல வந்தார்! பேருண்மை தானாய் வந்தார்!

ஆறுண்ட கொண்டை நீக்கி, மான்மழு சூலம் நீக்கி,

காருண்ய மூர்த்தி வந்தார்! காஞ்சிமா நகரே வந்தார்!

15.09.2018 : அனுஷ நன்னாள்

15.09.2018 : அனுஷ நன்னாள்

பாரதியின் "தொன்று நிகழ்ந்த தனைத்தும் உணர்ந்திடு 
சூழ்கலை வாணர்களும்" என்ற பாடல் வரிகளின் சந்தத்திலே பெரியவாளைப் பற்றிப் பாடவேண்டும் என்று தோன்றியது.  

ஆனை முகனாய், குஹனாய், அன்னை பராசக்தியாய், அந்த அன்னை சிவகாமி உளம்கவர் நடராஜனாய், அந்த அன்னையேயான திருமாலாய் விளங்கும் பெரியவாளை நமஸ்கரித்து, பாடலை, பெரியவாளின் பாதாரவிந்தங்களுக்கு சமர்ப்பிக்கிறேன்.

ஐந்து கரத்தவன் ஆனை முகக்கண

நாதனருட் கனியோன் - நித்தம்

சிந்துமருள் அமுதக்கடலாய் வரும்

முக்தனவன் நீயே! (1)

மன்றினில் ஆடிடும் வார்சடையன் நட

ராஜனெனும் தலைவன் - அவன்

சிந்தையில் ஆடிடும் சீர் மகனாம்

நடை ராஜன் அவன் நீயே! (2)

பாற்கடலிற் துயில் மாபொருளாம்

பரந்தாமனெனும் இறையோன் - அவன்

கூறும் உரைப் பொருள் தானது வாய்

திகழ்ந்திட்டவனும் நீயே! (3)

அண்டமனைத்தருள் நாயகியாம் பரா

சக்தி எனும் அன்னை - அவள்

விண்டமுதாமந்த வேதமதன் பொருள்

முற்றதுதுமாம் நீயே! (4)

வேலது கொண்டசுரர் குலம் மாய்த்திடும்

சூரனவன் முருகன் - எழில்

கோலமதே உரு கொண்டருள் செய்திடும்

சித்தனவன் நீயே! (5)

அத்தனை தெய்வமும் ஆனவுரு குரு

முத்தனவன் நீயே - எங்கள்

சித்தம் உறைந்தென்றும் இன்னருள் செய்திடும்

வித்தகனும் நீயே! (6)

23.07.2018 : அனுஷ நாள்

23.07.2018 : அனுஷ நன்னாள்

ஒவ்வொருவருக்கும் ஒவ்வொரு ஆசை. இந்த அனுஷ நாளிலே அடியார்களுக்கெல்லாம் என்னவெல்லாம் ஆசைகள் இருக்கும்? பெரியவா அதிஷ்டானம் செல்லவும், காஞ்சிவாழ் முனியின் அபிஷேகம் காணவும், அவருக்கு பூஜைகள் செய்யவும் என்று நிச்சயம் ஆசைகள் இருக்கும்.

அடியேனுக்கும் அவ்விதமே.

ஆனால், இந்த அனுஷ நாளிலே, வேறு வேறு விதமான ஆசைகள் மனதிலே தோன்றுகின்றன. ஒரு “time machine” ல் ஏறி, அந்த உம்மாச்சித் தாத்தாவின் குழந்தைப் பருவத்திலிருந்து, அந்தத் தெய்வக் குழந்தையின் பக்கத்திலேயே இருந்து பார்த்துப் பார்த்துக் களிக்க வேண்டுமென்று தோன்றியது.

மனதிலே கண்டு களித்த அந்த ஆசைகளையெல்லாம், இங்கே பட்டியலிடுகிறேன்.

பெரியவா சரணம்.

*************************************************************************************************************************

குழந்தையாய்த் தவழும் உன்னை அள்ளியே அணைக்க  ஆசை

பொழுதெலாம் உன்னை மார்பில் தூக்கியே சுமக்க ஆசை

சதுர்வேதம் மணக்கும் வாயில் வந்திடும் மழலை எல்லாம்

நிதமுமே கேட்க ஆசை; மறையதால் நிறைய ஆசை

ஓடியே ஆடும் தெய்வச் சிறுவனாம் உந்தன் பக்கம்

நாடியே நித்தம் நானும் இருந்துளம் களிக்க ஆசை

விளையாட்டுப் பிள்ளை நீயும் அலுத்தகம் திரும்பும்போது

களைப்பெலாம் போக்கி உண்டி கொடுத்துனைப் பார்க்க ஆசை

பள்ளிக்குப் பாடம் நீயும் படிக்கவே செல்லும்போது

துள்ளி நீ செல்லும் அழகை பார்த்து நான் ரசிக்க ஆசை

உலகுக்கே குருவாம் நீயும் வகுப்பிலே இருக்கும்போது

பல கற்கும் குழந்தை உன்னைப் பார்த்துளம் களிக்க ஆசை

கேட்டிடும் கேள்விக்கெல்லாம் விடைகளைச் சொல்லும் செல்லச்

சூட்டிகைக் கன்றைக் கண்டு வியக்கவே நெஞ்சில் ஆசை

உன்பாத ரேகை கண்டு, உருகியே நின்றாரந்த

நன்மகனாரைக் கண்டு வணங்கியே நிற்க ஆசை

குருவினைக் கண்டு நெஞ்சம் சிலிர்த்தவர் அண்மை தேடிக்

கருக்கலில் ஓடிச்சென்ற குழந்தையைக் கொஞ்ச ஆசை

வந்த அச்சிறுவன் பின்னாள் "பெரியவாள்" ஆகப் போகும்

விந்தையை அறிந்த பரம குருவையும் பார்க்க ஆசை

உலகுக்கே குருவாம் உன்னைத் தரணிக்குத் தந்த பெற்றோர்

தலம் நாடி நமஸ்கரித்துப் போற்றியே நிற்க ஆசை

குருமார்கள் இறையைச் சேர, மடமுன்னை அழைக்க நீயும்

அருந்தவ வாழ்வை நாடிச் சென்றதைப் பார்க்க ஆசை

எதற்கிந்த அழைப்பு என்று அறியாமல் வண்டி ஏறிப்

பதறிய குழந்தை தன்னை அணைத்தங்கு நிற்க ஆசை

எதற்கிந்த அழைப்பு என்று அறிந்தபின் ராம நாமம்

அதனையே சொல்லிச் சென்ற குழந்தையோடிருக்க ஆசை

சிறுவனாய்ச் சென்று லோக குருவாக உயர்ந்த நாதன்

திருமலர்ப் பாதம் தன்னை வணங்கியே நிற்க ஆசை

குருகுல வாசம் செய்யும் பரமனைத் தொழுது நாளும்

அருகினில் இருந்து சேவை செய்யவே மனதில் ஆசை

பாடமே சொல்ல வந்த குரு அவர் உன்னிடத்தில்

பாடமே கேட்ட அந்த நாளுன்கூடிருக்க ஆசை

காவிரியாற்றில் நீந்தி அக்கரை சேரும் நாதன்

சேவடி சென்னி வைத்து வாழ்வினைக் கடக்க ஆசை

காசியாத் திரையாய்ச் செல்லும் பால சன்யாசியோடு

பேசியே ஊரூராக யாத்திரை செல்ல ஆசை

பால சன்யாசி காஞ்சி ஸ்வாமியாய் உயர்ந்திருக்கும்

கோலமே கண்டு நித்தம் கூடவே இருக்க ஆசை

பாத யாத்திரையாய் எங்கும் பெரியவா செல்லும் நேரம்

பாதைசீர் திருத்தி வைத்துப் பாதமே தாங்க ஆசை

பள்ளிக் கல்லூரி பாடம் சந்தேகமெல்லாம் கூட,

மெள்ள உம்மாச்சித் தாத்தா அவரிடம் கேட்க ஆசை

உம்மாச்சித் தாத்தா உண்ட உச்சிஷ்டம் உண்டு நானும்

சும்மாவே இருந்து சொல்லும் அற்றுப் போய்விடவே ஆசை

மானுடப் போர்வை போர்த்து நாடெலாம் நடந்த தெய்வக்

கோனினை நாளும் போதும் நெஞ்சிலே சுமக்க ஆசை

26.06.2018 : அனுஷ நன்னாள்

26.06.2018 : அனுஷ நன்னாள்

இன்றைய அனுஷ நன்னாளிலே, பெரியவாளை, “விதிதாகில சாஸ்த்ர ஸுதா ஜலதே” என்று தொடங்கும் தோடகாஷ்டகத்தின் அந்த சந்தத்திலே பாடவேண்டும் என்று தோன்றியது.

பக்தி மயமா, பகவத் பாதாளைப் பாடின அந்தத் தோடகாச்சார்யாளோட பக்தி, வினயத்தில் கோடியில் ஒரே ஒரு துளியாவது அடியேனுக்கும் வரட்டும்.

உனை நான் நிதமும் தொழுதே பணியும்

ஒருமா வரமே தருவாய், வருவாய்!

வினையா வையுமே பொடியாக்கிடுவாய்

குரு சங்கர தேசிகனே சரணம்! (1)

அறுமா பகைவர் குடியேறியழி

உளமீதினிலே குருவே வருவாய்

உறுபா வியிவன் பொறுத்தே அருள்வாய்

குரு சங்கர தேசிகனே சரணம்! (2)

உனையோர்க் கணமும் நினையா மனமா

கியசேற்றினிலே பதபங்கயமா

இணையே தருவாய் இனிதே வருவாய்

குரு சங்கர தேசிகனே சரணம்! (3)

திருவின் மகனே! பெருமாமலைதன்

மகளின் மகனே! குருபுங்கவனே

ஒரு சீருமிலேன் பதமே அருள்வாய்

குரு சங்கர தேசிகனே சரணம்! (4)

குறையேது மிலா தவமா மலையே

விலையேதுமிலா அருள்மா மழையே!

நிறையேதுமிலா எனையும் தடுத்தாள்

குருசங்கர தேசிகனே சரணம்! (5)

பிறைசூடியசன் திரசேகரனே!

விதி நாடிபணி சுடர்க்கோமகனே!

இறையாமுனையே கதியாயடைந்தேன்

குருசங்கர தேசிகனே சரணம்! (6)

மதியேதுமிலேன் கதியேதுமிலேன்

சிறையாமுடலே சுகமென்றுழல்வேன்

துதிசெய்துனது கழலே பணிந்தேன்

குருசங்கர தேசிகனே சரணம்! (7)

மறை நாயகனே சரணம் சரணம்

மலைமா மருகா சரணம் சரணம்

கறைக் கண்ட நடேசா! சரணம்!

குருசங்கர தேசிகனே சரணம்! (8)